un ke ruḳh par nikhār kā aalam

gulistāñ par bahār kā aalam

mast āñkhoñ meñ shabnamī aañsū

gauhar-e-ābdār kā aalam

un ke aane pe un ke jaane par

dil-e-be-iḳhtiyār kā aalam

raqs karte haiñ kitne paimāne

us nazar meñ ḳhumār kā aalam

vā-e-hasrat ki tere hote bhī

tere hī intizār kā aalam

ruuTh jaanā tirā lagāvaT se

be-ruḳhī meñ bhī pyaar kā aalam

barq uTThī balā.eñ lene ko

hai qafas par bahār kā aalam

arz-e-matlab pe mere ai 'nayyar'

nigah-e-sharm-sār kā aalam