shor-e-mahshar uThā har samt se mai-ḳhāne meñ
jaane kyā Daal diyā saaqī ne paimāne meñ
mahfil-e-husn meñ shauq-e-dil-e-zāhid mat pūchh
ghol kar tauba ko pī jaate haiñ paimāne meñ
mil gayā mujh ko parī-ḳhāna-e-dil meñ āḳhir
jis ko DhūñDā thā bahut ka.abe meñ but-ḳhāne meñ
uTh ga.e rind-e-balā-nosh sanam-ḳhāne se
ḳhaak uḌtī sī nazar aatī hai mai-ḳhāne meñ
kārvāñ manzil-e-maqsūd pe pahuñchā 'nayyar'
maiñ ki phirtā huuñ abhī dasht meñ vīrāne meñ