kāġhaz kab tak dhyān meñ rakkhā jā.egā
āḳhir kūḌe-dān meñ rakkhā jā.egā
āñkhoñ kī is baar rihā.ī mumkin hai
ḳhvāboñ ko zindān meñ rakkhā jā.egā
sab ko dil ke kamre tak kab lā.eñge
kuchh logoñ ko lawn meñ rakkhā jā.egā
bātoñ se jab peT kā kamra bhar jaa.e
to phir in ko kaan meñ rakkhā jā.egā
jis ko chāhe hoñT uThā kar le jaa.eñ
lafzoñ ko maidān meñ rakkhā jā.egā
ham kab qabr kī miTTī ke haath ā.eñge
ham ko to dīvān meñ rakkhā jā.egā