zamīn-e-chashm meñ bo.e the maiñ ne ḳhvāb ke biij

magar uge to khulā vo the iztirāb ke biij

mujhe hī kaaT ke miTTī meñ gāḌnā hogā

ki kaun degā mirī jaañ tumheñ gulāb ke biij

zamīñ pe aise chamakte haiñ ret ke zarre

kisī ne jaise bikhere hoñ āftāb ke biij

vo merī ruuh meñ utrā to kab gumān bhī thā

dabā rahā hai mirī ruuh meñ azaab ke biij

tamām umr kaTī ik fareb meñ 'azmī'

bikher kar vo gayā duur tak sarāb ke biij