yād-e-ayyām ki ham-rutba-e-rizvāñ ham the

bāġhbān-e-chaman-e-mahfil-e-jānāñ ham the

qābil-e-qatl na ai lashkar-e-mizhgāñ ham the

dil kī ujḌī huī bastī ke nigahbāñ ham the

dhajjiyāñ jeb kī hāthoñ meñ haiñ aaj ai vahshat

jāma-zeboñ se kabhī dast-o-garebāñ ham the

jaan lī gesūoñ ne ulfat-e-ruḳh meñ āḳhir

kāfiroñ ne hameñ maarā ki musalmāñ ham the

ġhair ke ghar kī taraf ke jo uThe the parde

itr bāloñ meñ vo malte the pareshāñ ham the

qafas-e-tañg meñ ghuT ghuT ke na marte kyūñ-kar

nāz-parvarda-e-āġhosh-e-gulistāñ ham the

ruuh taḌpī hai pa-e-lāla-e-sahrā kyā kyā

fasl-e-gul josh pe thī qaidi-e-zindāñ ham the

dil ke dene meñ ta.ammul hameñ hotā kyūñ-kar

ye hasīnoñ kī amānat thī nigahbāñ ham the

aaj thī shab ko bahut dāġh-e-jigar meñ sozish

kahtī thī un kī malāhat namak-afshāñ ham the

sho.ala-e-husn se thā dūd-e-dil apnā avval

aag duniyā meñ na aa.ī thī ki sozāñ ham the

har taraf dahr meñ thā zulf kī zanjīr kā gul

magar ai josh-e-junūñ silsila-jumbāñ ham the

qāfile raat ko aate the udhar jaan ke aag

dasht-e-ġhurbat meñ jidhar ai dil-e-sozāñ ham the

kahte haiñ āriz-e-mahbūb ki thī raat jo garm

chāñd par os paḌī thī araq-afshāñ ham the

tauq minnat ke gale meñ the vo din yaad karo

tum par us ahd meñ bhī chāk-garebāñ ham the

dete phirte the hasīnoñ kī galī meñ āvāz

kabhī ā.īna-farosh-e-dil-e-hairāñ ham the

Duub jaate haiñ jo rah rah ke 'ta.ashshuq' taare

misl-e-abr āḳhir-e-shab vasl meñ giryāñ ham the