kitāb-e-umr meñ ik vo bhī baab hotā hai
har ik savāl jahāñ lā-javāb hotā hai
maiñ pī gayā huuñ yahī soch kar tire aañsū
hasīn āñkhoñ kā paanī sharāb hotā hai
mire bhī haath meñ aayā thā jaam TuuT gayā
kisī kisī kā muqaddar ḳharāb hotā hai
laboñ se harf-e-mohabbat adā nahīñ hotā
nazar nazar se savāl-o-javāb hotā hai
kisī ke dard ko samjho kisī kā ġham le lo
kisī kā haath baTānā savāb hotā hai
kabhī vo jāgtā rahtā hai soī āñkhoñ meñ
kabhī vo jāgtī āñkhoñ kā ḳhvāb hotā hai
makīñ ban ke yahāñ kaun aa.egā 'sīmāb'
dil-e-shikasta makān-e-ḳharāb hotā hai