avval to tire kūche meñ aanā nahīñ miltā

aa.uuñ to kahīñ terā Thikānā nahīñ miltā

milnā jo mirā chhoḌ diyā tū ne to mujh se

ḳhātir se tirī saarā zamānā nahīñ miltā

aave to bahāne se chalā shab mire ghar ko

aisā koī kyā tujh ko bahānā nahīñ miltā

kyā fā.eda gar hirs kare zar kī tū nādāñ

kuchh hirs se qārūñ kā ḳhazānā nahīñ miltā

bhūle se bhī us ne na kahā yuuñ mire haq meñ

kyā ho gayā jo ab vo divānā nahīñ miltā

phir baiThne kā mujh ko maza hī nahīñ uThtā

jab tak ki tire shāne se shānā nahīñ miltā

ai 'mus.hafī' ustād-e-fan-e-reḳhta-goī

tujh sā koī aalam ko maiñ chhānā nahīñ miltā