ahl-e-dil gar jahāñ se uThtā hai

ik jahāñ jism o jaañ se uThtā hai

chalo ai ham-raho ġhanīmat hai

jo qadam is jahāñ se uThtā hai

jama.a rakhte nahīñ, nahīñ ma.alūm

ḳharch apnā kahāñ se uThtā hai

gar naqāb us ke muñh se uTThī nahīñ

shor kyuuñ kārvāñ se uThtā hai

vaa.e be-tāqatī o be-sabrī

parda jab darmiyāñ se uThtā hai

phir vahīñ gir paḌe hai parvāna

gar Tuk ik sham.a-dāñ se uThtā hai

qissa-e-'mus.hafī' sunā kar yaar

ishq is dāstāñ se uThtā hai