tum garm mile ham se na sarmā ke dinoñ meñ
pesh aa.e ba-garmī bhī to garmā ke dinoñ meñ
jab aa.ī ḳhizāñ ham ko kahā ''bāġh chalo ho''
pūchhā na kabhī sair o tamāshā ke dinoñ meñ
ne ġhurfe se jhāñkā na kabhī baam par aa.e
pinhāñ rahe tum husn-e-dil-ārā ke dinoñ meñ
jī hī meñ rakhī apne miyāñ jī se jo upjī
kuchh ham ne kahā tum se tamannā ke dinoñ meñ
likh likh ke use yāroñ ne dīvān banāyā
kuchh kuchh jo bakā karte the saudā ke dinoñ meñ
dil apnā ulajhtā thā tabhī jin dinoñ pyāre
thī zulf tirī turra-e-lailā ke dinoñ meñ
muflis hue ai 'mus.hafī' afsos ki ham ne
paidā na kiyā yaar ko paidā ke dinoñ meñ