be-lāg haiñ ham ham ko rukāvaT nahīñ aatī
kyā baat banāveñ ki banāvaT nahīñ aatī
hai dhyān lagā dar kī taraf par ka.ī din se
kānoñ meñ tire paañv kī aahaT nahīñ aatī
dandān-e-havas se use masla hai kisū ne
bose se to lab par ye nilāhaT nahīñ aatī
kājal ne tirī āñkhoñ meñ jo lutf diyā hai
har ek ke hisse ye ghulāvaT nahīñ aatī
kyā jāma-e-chaspāñ kā tire vasf karūñ maiñ
taqrīr meñ kuchh us kī sajāvaT nahīñ aatī
hai rañg siyāhī liye juuñ us kī hinā kā
hāthoñ pe har ik ke ye udāhaT nahīñ aatī
ai 'mus.hafī' baiThe haiñ ham us bazm meñ ḳhāmosh
kyā baat banāveñ ki banāvaT nahīñ aatī