ḳharīdār apnā ham ko jānte ho
bhalā itnā to tum pahchānte ho
banegā chehra ye kis kā mah o mahr
jo tum baiThe sabāhat chhānte ho
uTho ai zaḳhmiyān-e-kūcha-e-yār
abas kyuuñ ḳhuuñ meñ maaTī sānte ho
vo aane kā nahīñ ab ghar se bāhar
tum us qātil ko kam pahchānte ho
yakā-yak kar guzarte ho vahī jaan
tum apne jī meñ jo kuchh Thānte ho
ġharaz ho āshnā apnī hī zid ke
kisī kī baat ko kab mānte ho
gayā hai qāfila myaañ 'mus.hafī' ab
abas dāman ko tum gardānte ho