chale le ke sar par gunāhoñ kī gaThrī

safar meñ ye hai rū-siyāhoñ kī gaThrī

paḌī roz-e-mahshar vahīñ barq aa kar

jahāñ thī tire dād-ḳhvāhoñ kī gaThrī

musāfir maiñ us dasht kā huuñ ki jis meñ

luTī kitne gum-karda-rāhoñ kī gaThrī

jahāñ suus ne bahr se sar nikālā

maiñ samjhā hai kashtī tabāhoñ kī gaThrī

kulāh-e-zarī māh-e-nau ne uḌā lī

khulī thī kahīñ kaj-kulāhoñ kī gaThrī

ham un sarqa vāloñ meñ ai 'mus.hafī' haiñ

churāte haiñ jo bādshāhoñ kī gaThrī