dil churānā ye kaam hai terā
le gayā hai to naam hai terā
hai qayāmat bapā ki jalve meñ
qāmat-e-ḳhush-ḳhirām hai terā
jis ne aalam kiyā hai zer-o-zabar
ye ḳhat-e-mushk-fām hai terā
diid karne ko chāhiyeñ āñkheñ
har taraf jalva aam hai terā
kis kā ye ḳhuuñ kiye tū aatā hai
dāman afshāñ tamām hai terā
ho na ho tū hamārī majlis meñ
tazkira sub.h o shaam hai terā
teġh-e-abrū hameñ bhī de ik zaḳhm
sar pe aalam ke daam hai terā
tū jo kahtā hai 'mus.hafī' idhar aa
'mus.hafī' kyā ġhulām hai terā