asar mirī zabān meñ nahīñ rahā

vo tiir ab kamān meñ nahīñ rahā

hai pattharoñ kā qarz us ke dosh par

jo kāñch ke makān meñ nahīñ rahā

alaav sard ho ga.e hayāt ke

rachāo dāstān meñ nahīñ rahā

thā jis pe merī zindagī kā inhisār

usī kā naam dhyān meñ nahīñ rahā

gumān hī asāsa thā yaqīn kā

yaqīn hī gumān meñ nahīñ rahā

huā jo sahl us ke ghar kā rāsta

maza hī kuchh takān meñ nahīñ rahā

na kī kabhī bhī fikr maiñ ne suud kī

kabhī bhī maiñ ziyān meñ nahīñ rahā

vo kho gayā ġhubār-e-gard-e-rāh meñ

jo shaḳhs imtihān meñ nahīñ rahā

ḳhamoshiyoñ ne bhar diyā ḳhalāoñ ko

suḳhan vo darmiyān meñ nahīñ rahā

taḌap uThe jise ḳharīdne ko dil

vo maal hī dukān meñ nahīñ rahā