us but ko nahīñ hai Dar ḳhudā se

bigḌī bande se gar ḳhudā se

go ḳhalq bhī jaane haal merā

poshīda nahīñ magar ḳhudā se

hai ham se to aah aah karnā

denā is ko asar ḳhudā se

ham ne use apnā suud jaanā

pahuñchā bhī agar zarar ḳhudā se

dekhā hai maiñ jab se vo but-e-shoḳh

phir ga.ī hai mirī nazar ḳhudā se

bāzīche meñ hai udhar vo mashġhūl

aur ban rahī hai idhar ḳhudā se

kuchh ḳhuub nahīñ ye ḳhud-numā.ī

haañ ai but-e-shoḳh Dar ḳhudā se

hai bair ḳhudā.ī aur ḳhudī meñ

itnī bhī ḳhudī na kar ḳhudā se

ye saare ḳhudā-shanās haiñ lek

detā nahīñ koī ḳhabar ḳhudā se

ai 'mus.hafī' kuchh kamī nahīñ vaañ

jo chāhe so maañg par ḳhudā se