in pattharoñ ke shahr meñ dil kā guzar kahāñ
le jaa.eñ ham uThā ke ye shīshe kā ghar kahāñ
ham apnā naam le ke ḳhud apne hī shahr meñ
ghar ghar pukār aa.e khulā koī dar kahāñ
jaise har ek dar pe ḳhamoshī kā qufl ho
ab gūñjtī hai shahr meñ zanjīr-e-dar kahāñ
har vaqt sāmne thā samundar ḳhulūs kā
lekin kisī ne dekhā kabhī Duub kar kahāñ
jo chāho bhī to jism se nikaloge kis tarah
mahbas meñ saañs ke koī dīvār-o-dar kahāñ
is saḳht dopahar meñ kahāñ jā ke baiThiye
rāhoñ meñ duur tak 'sabā' koī shajar kahāñ