dard ke chehre badal jaate haiñ kyuuñ
marsiye naġhmoñ meñ Dhal jaate haiñ kyuuñ
soch ke paikar nahīñ jab mom ke
haath aate hī pighal jaate haiñ kyuuñ
jab bikhar jaatī hai ḳhush-bū ḳhvāb kī
niind ke gesū machal jaate haiñ kyuuñ
jhiil sī āñkhoñ meñ mujh ko dekh kar
do diye chupke se jal jaate haiñ kyuuñ
dhuup chhūtī hai badan ko jab 'shamīm'
barf ke sūraj pighal jaate haiñ kyuuñ