har ek lafz meñ poshīda ik alaao na rakh
hai dostī to takalluf kā rakh-rakhāo na rakh
har ek aks ravānī kī nazr hotā hai
nadī se kaun ye jā kar kahe bahāo na rakh
ye aur baat zamāne pe āshkār na ho
mirī nazar se chhupā kar tū dil kā ghaao na rakh
hisār-e-zāt se kaT kar to jī nahīñ sakte
bhañvar kī zad se yuuñ mahfūz apnī naav na rakh
ye inkisār mubārak 'shamīm' tujh ko magar
ab itnā shāḳh-e-samar-dār meñ jhukāv na rakh