koī hasrat bhī nahīñ koī tamannā bhī nahīñ
dil vo aañsū jo kisī aañkh se chhalkā bhī nahīñ
ruuTh kar baiTh ga.ī himmat-e-dushvār-pasand
raah meñ ab koī jaltā huā sahrā bhī nahīñ
aage kuchh log hameñ dekh ke hañs dete the
ab ye aalam hai koī dekhne vaalā bhī nahīñ
dard vo aag ki bujhtī nahīñ jaltī bhī nahīñ
yaad vo zaḳhm ki bhartā nahīñ ristā bhī nahīñ
bādbāñ khol ke baiThe haiñ safīnoñ vaale
paar utarne ke liye halkā sā jhoñkā bhī nahīñ