dil pe jab dard kī uftād paḌī hotī hai
dosto vo to qayāmat kī ghaḌī hotī hai
jis taraf jaa.eñ jahāñ jaa.eñ bharī duniyā meñ
rāsta roke tirī yaad khaḌī hotī hai
jis ne mar mar ke guzārī ho ye us se pūchho
hijr kī raat bhalā kitnī kaḌī hotī hai
hañste hoñToñ se bhī jhaḌte haiñ fasāne ġham ke
ḳhushk āñkhoñ meñ bhī sāvan kī jhaḌī hotī hai
jab koī shaḳhs kahīñ zikr-e-vafā kartā hai
dil ko ai dosto taklīf baḌī hotī hai
is tarah baiThe haiñ vo aaj mirī mahfil meñ
jis tarah shīshe meñ tasvīr jaḌī hotī hai