jis raah se bhī guzar ga.e ham
har dil ko gudāz kar ga.e ham
jalve the kisī ke kār-farmā
har naqsh meñ rañg bhar ga.e ham
kyā jāniye kyā thā us nazar meñ
uljhe to sañvar sañvar ga.e ham
ham bhāñp ga.e the rañg-e-mahfil
kahne ko to be-ḳhabar ga.e ham
har dil thā udāsiyoñ kā ma.abad
har gaam Thahar Thahar ga.e ham
be-mehrī-e-dost talḳhi-e-zīst
kis kis se nibāh kar ga.e ham
ummīd-e-vafā pe jiine vaalo
ummīd-e-vafā meñ mar ga.e ham