lamha lamha shumār kaun kare
umr bhar intizār kaun kare
koī va.ada bhī to vafā na huā
be-vafāoñ se pyaar kaun kare
shab-e-tīra-o-tār kā dāman
dekhiye taar taar kaun kare
dostī ek lafz-e-be-ma.anī
kis pe ab inhisār kaun kare
ai ġham-e-dost tere hote hue
ġham-e-lail-o-nahār kaun kare
tere is dard-e-lā-davā kā ilaaj
dil-e-zār-o-nazār kaun kare
silsila TūTnā thā TuuT gayā
ab use ustuvār kaun kare