jab paañv milā thā to raste bhī nazar aate

tum tak na sahī lekin tā-hadd-e-nazar jaate

tum aañkh nahīñ rakhte aur dekhte ho sab kuchh

ham aañkh bhī rakhte haiñ aur dekh nahīñ paate

har raah to manzil tak le jaatī nahīñ sab ko

kuchh der idhar chalte kuchh der udhar jaate

parda vo uThāyā to parda hī nazar aayā

jab kuchh na nazar aayā to kyuuñ na Thahar jaate

ye ishq nahīñ ye hai kam-bīnī o kam-aqalī

ik lutf-e-tabassum par itnā nahīñ itrāte

jo ho na 'jamīl' apnā auroñ kā vo kyā hogā

kyā khāoge ġham merā tum apnā hī ġham khāte