kab tak nibāheñ aise ġhalat aadmī se ham
duniyā hai 'maz.harī' se ḳhafā 'maz.harī' se ham
bhāge zarūr arsa-e-tañg-e-ḳhudī se ham
nikle magar na dā.ira-e-āgahī se ham
is zindagī ne aap se rakkhā hai mujh ko duur
kis tarah intiqām na leñ zindagī se ham
har jāma-e-sifāt meñ kyuuñ kar na jhol ho
hai ye ki nāpte haiñ ḳhudā ko ḳhudī se ham
tulte haiñ jis tarāzū meñ sīm-o-zar o guhar
kyā zulm hai diloñ ko bhī tauleñ usī se ham
sairābiyāñ 'jamīl' ko itnā na de sakīñ
jitnā ki faizyāb hue tishnagī se ham