ḳhānumāñ-soz mā-sivā huuñ maiñ

apne saa.e se bhī judā huuñ maiñ

ġhaur har chand kar rahā huuñ maiñ

par ye khultā nahīñ ki kyā huuñ maiñ

nahīñ is rah meñ dūsre kī khapat

aap hī apnā rahnumā huuñ maiñ

vo agar aa mileñ to kyā hai ajab

ġham se kuchh aur ho gayā huuñ maiñ

dil hai shauq-e-gunāh se labrez

dekhne hī kā pārsā huuñ maiñ

kyuuñ na ho daar kā vo mustaujib

jo ki banda kahe ḳhudā huuñ maiñ

soz-e-dil kar chukā hai jism ko ḳhaak

ab tirā muntazir sabā huuñ maiñ

har lab-e-zaḳhm-e-tan se maiñ dam-e-qatl

kahtā qātil ko marhabā huuñ maiñ

un sā maġhrūr aur pursish-e-hāl

ḳhvāb hai ye jo dekhtā huuñ maiñ

mujh sā hogā na saḳht-jāñ koī

ki shab-e-hijr meñ jiyā huuñ maiñ

merī pursish jo kī kisī ne to vo

bole haañ sūrat-āshnā huuñ maiñ

shāreh-e-hāl-e-dil samajh mujh ko

dard hī dard ho gayā huuñ maiñ

aañkh tak Dāltā nahīñ gāhak

kuchh ajab jins-e-nā-ravā huuñ maiñ

roz-o-shab hai ḳhayāl-e-kākul-o-zulf

kin balāoñ meñ phañs rahā huuñ maiñ

misl-e-nashtar haiñ ḳhār-e-sahrā.ī

aur vahshat barhana-pā huuñ maiñ

kal jo maiñ ne kahā ki o be-mehr

dard-e-furqat se mar rahā huuñ maiñ

hañs ke bole ye sab banāvaT hai

aap ko ḳhuub jāntā huuñ maiñ

dikhne kyā zaḳhm-e-dil lage 'majrūh'

haa.e haa.e jo kar rahā huuñ maiñ