harīm-e-dil meñ Thahar yā sarā-e-jān meñ ruk
ye sab makān haiñ tere kisī makān meñ ruk
abhī maiñ joḌ rahā huuñ yaqīn kā pyāla
tū aisā kar ki abhī kāsa-e-gumān meñ ruk
maiñ tujh ko bāñdh luuñ apnī ġhazal ke sheroñ meñ
ḳhayāl-e-yār zarā der mere dhyān meñ ruk
bahut sī qaus-e-quzah ban rahī haiñ āñkhoñ meñ
ai haft-rañg parī merī dāstān meñ ruk
maiñ apne sheroñ kā me.aar kuchh buland karūñ
mire hurūf meñ zam ho mirī zabān meñ ruk