vahīñ pe sach kā mujhe tarjumān honā thā
qadam qadam pe jahāñ imtihān honā thā
tumhārī yaad ko kab tak sajā ke rakhtā maiñ
kabhī to ḳhālī ye dil kā makān honā thā
ajiib shauq thā us ko bhī haq-navā.ī kā
gañvā ke jaan bhī jag meñ mahān honā thā
maiñ aur hirs kyā kartā lapak ke chhūne kī
mujhe zamīn use āsmān honā thā
havā kī hukm-udūlī se mujh ko hāsil kyā
mire nasīb meñ jab bādbān honā thā