mirī auqāt vo is tarah batā detā hai
ḳhaak le kar ke havāoñ meñ uḌā detā hai
maiñ bahut duur chalā jaatā huuñ jab bhī ḳhud se
mere andar se koī mujh ko sadā detā hai
laakh kartā rahā maiñ us ko bhulāne kī sa.ī
yaad rah rah ke koī us kī dilā detā hai
jab bhī chāhā ki use baḌh ke maiñ fauran chhū luuñ
kachchī nīñdoñ se koī mujh ko jagā detā hai
us se vābasta haiñ kuchh aisī purānī yādeñ
jab bhī aatā hai mirī niiñd uḌā detā hai