mismār huuñ ki ḳhud ko uThāne lagā thā maiñ
miTTī se āsmān banāne lagā thā maiñ
be-iḳhtiyār āñkhoñ se aañsū nikal paḌe
tasvīr se ġhubār haTāne lagā thā maiñ
āvāz de ke rok liyā us ne jis ghaḌī
māyūs ho ke lauT ke jaane lagā thā maiñ
bhaTkā zarā jo dhyān mire haath jal ga.e
bosīda kāġhzāt jalāne lagā thā maiñ
afsos ḳhvāb-e-marg ne mohlat na dī 'shahāb'
soyā huā nasīb jagāne lagā thā maiñ