kahīñ kā ġhussa kahīñ kī ghuTan utārte haiñ
ġhurūr ye hai kāġhaz pe fan utārte haiñ
sunī hai TūTte pattoñ kī ham ne sargoshī
ye peḌ paude bhī kyā pairahan utārte haiñ
siyāsī logoñ se ummīd kaisī ḳhāk-e-vatan
vatan kā qarz kahīñ rāhzan utārte haiñ
zamīñ pe rakh deñ agar aap apnī shamshīreñ
to ham bhī apne saroñ se kafan utārte haiñ
utar ke ruuh kī gahrā.iyoñ meñ ham har roz
ḳhud apnī qabr meñ apnā badan utārte haiñ
ḳhudā kare ki salāmat raheñ ye būḌhe shajar
ki ham parinde yahīñ par thakan utārte haiñ