naqsh āḳhir aap apnā hādisa ho jā.egā

aur tai vahm-o-yaqīñ kā marhala ho jā.egā

guuñj uTTheñge dar-o-dīvār apne karb se

lafz jo tishna hai ma.anī-āshnā ho jā.egā

jism bhī pighleñge saa.e bhī na Thahreñge kahīñ

jaane kab ye sabz manzar bhī havā ho jā.egā

log sab us kī kahānī jaan leñge harf harf

aur vo ḳhush-posh khul kar be-ridā ho jā.egā

peḌ ugleñge syāhī kā samundar dekhnā

mausam-e-ḳhush-rañg 'muztar' zaḳhm-e-pā ho jā.egā