ye tai nahīñ ki sadā āñsuoñ se likkheñge
kabhī to ham bhī ġhazal ḳhushbuoñ se likkheñge
hamārī pyaas kā ahvāl reg-zāroñ par
sulagte chīḳhte mausam lavoñ se likkheñge
sahāfiyoñ ko kahāñ hāl-e-dil sunā baiThe
zarā sī baat ka.ī zāviyoñ se likkheñge
na ḳhush ho jaan ke be-dast ham tirā anjām
inheñ tarāshe ga.e bāzuoñ se likkheñge
bhale hī TuuT chukī haiñ magar hameñ sauñpo
ki ham kināra inheñ chappuoñ se likkheñge