be-mausam hī āñkhoñ meñ bhar jaate haiñ
aañsū bhī to chālākī kar jaate haiñ
dil kā saudā un ke bas kī baat nahīñ
aune-paune daam lagā kar jaate haiñ
har din zinda rahne meñ hai ḳharch bahut
aao chalo ik do din ko mar jaate haiñ
qatl ujāle bhī kar dete haiñ lekin
sab ilzām añdheroñ ke sar jaate haiñ
kaise jī lete haiñ log añdheroñ meñ
ham to sirf tasavvur se Dar jaate haiñ
reza reza honā un kī qismat hai
sū-e-falak jo be-bāl-o-par jaate haiñ