vo jo e'tibār-e-jamāl the vo kahāñ ga.e
vo jo aap apnī misāl the vo kahāñ ga.e
kabhī har taraf koī dilkashī sī muhīt thī
usī dasht meñ jo ġhazāl the vo kahāñ ga.e
kahīñ ek pal ko bhī tū nazar nahīñ aa rahā
ġham-e-dil tire mah-o-sāl the vo kahāñ ga.e
vo jo ḳhvāb le ke chale the ham vo kahāñ gayā
vo jo us ke ġham meñ niDhāl the vo kahāñ ga.e
kabhī pahroñ us kā bas ik usī kā ḳhayāl thā
vo jo hijr the jo visāl the vo kahāñ ga.e
kabhī pahle jab vo milā thā vaisā nahīñ rahā
ka.ī rañg us meñ kamāl the vo kahāñ ga.e
ye jo log mere qarīb haiñ ye kahāñ ke haiñ
vo jo husn-e-ḳhvāb-o-ḳhayāl the vo kahāñ ga.e