ab junūñ ke rat-jage ḳhirad meñ aa ga.e
saare ḳhvāb raushnī kī zad meñ aa ga.e
log pā ga.e haqīqateñ qayās meñ
ham yaqīn se gumāñ kī had meñ aa ga.e
ilm ke murāqabe haiñ ġhair-mustanad
jehl ke munāzare sanad meñ aa ga.e
lafz-e-fat.h ke jo tarjumān the kabhī
kyuuñ simaT ke harf-e-al-madad meñ aa ga.e
ik panāh kyā malī ki husn-o-ishq ke
sab gunāh nekiyoñ kī mad meñ aa ga.e
dal kī tah meñ 'āzim' un kī yaad rah ga.ī
ġham ubhar ke mere ḳhāl-o-ḳhad meñ aa ga.e