paañv phañse meñ haath chhuḌāne aayā thā
tum se mil kar vāpas jaane aayā thā
saarā shor mire andar kā jaag uTThā
sannāToñ meñ dil bahlāne aayā thā
jañgal jaisī raat kahāñ tanhā kaTtī
terā ġham bhī haath baTāne aayā thā
duniyā par maiñ ne bhī parda Daal diyā
vo bhī dil kī baat batāne aayā thā
āñkheñ jhapkīñ ahd-e-javānī biit gayā
le kar kitne ḳhvāb suhāne aayā thā
'āzim' dil kī kā.ī-zada chaTTānoñ par
dard kā lashkar paañv jamāne aayā thā