agar sune to kisī ko yaqīñ nahīñ aa.e
makāñ bulāte rahe aur makīñ nahīñ aa.e
vo chand lafz jo kuchh bhī nahīñ sivā sach ke
vo chand lafz bayāñ meñ kahīñ nahīñ aa.e
to kyā huā jo ye tan mil rahe haiñ miTTī meñ
abhī vo ḳhvāb to zer-e-zamīñ nahīñ aa.e
abhī se naaz na kar itnā ḳhush-libāsī par
abhī to bazm meñ vo nukta-chīñ nahīñ aa.e
kisī kī aañkh meñ raushan haiñ jaisī ta.abīreñ
idhar to ḳhvāb bhī itne hasīñ nahīñ aa.e