havas ke biij badan jab se dil meñ bone lagā
maiñ ḳhud se milne ke saare javāz khone lagā
rafīq-e-sub.h thā sūraj se rishta-dārī thī
sipāh-e-shab meñ ye kis kā shumār hone lagā
ajiib manzar-e-āḳhir thā bujhtī āñkhoñ meñ
vo mujh ko maar ke be-iḳhtiyār rone lagā
is ehtiyāt kī sarhad sazā se miltī hai
lahū kā naam liyā āstīn dhone lagā
phir is ke ba.ad ye saarī zamīn merī thī
jagā ke jab se mujhe ye zamīr sone lagā