ajab tilism hai nairañg-e-jāvedānī kā
ki TūTtā hī nahīñ nashsha ḳhud-gumānī kā
safar tamām huā jab sarāb kā to khulā
ajiib zā.iqa hotā hai ThanDe paanī kā
jahāñ pe ḳhatm vahīñ se shurūa hotī hai
tabhī to zikr-e-musalsal hai is kahānī kā
kidhar Dubo ke kahāñ par ubhārtā hai tū
ye kaisā rañg hai dariyā tirī ravānī kā
vo mujh meñ ab bhī vahī hausle talāshtā hai
kahāñ se DhūñD ke laa.eñ badal javānī kā