ye dhund ye ġhubār chhaTe to patā chale
sūraj kā haal raat kaTe to patā chale
chehroñ ke ḳhad-o-ḳhāl salāmat haiñ yā nahīñ
ab ā.īnoñ se gard haTe to patā chale
zulmat ke kārobār meñ us kā bhī ek din
chehra ġhubār-e-shab se aTe to patā chale
ummīd kī ye nannhī kiran vāhima na ho
ab chādar-e-siyāh phaTe to patā chale
bikhrā huā hai merā qabīla kahāñ talak
sauġhāt-e-dard phir se miTe to pata chale
ghar meñ vo ik purānī sī tasvīr thī ki hai
sail-e-balā kā zor ghaTe to pata chale