ġham chhupāne meñ vaqt lagtā hai

muskurāne meñ vaqt lagtā hai

ruuTh jaane kā koī vaqt nahīñ

par manāne meñ vaqt lagtā hai

zid kā bistar sameTiye dilbar

ghar basāne meñ vaqt lagtā hai

jā ke aane kī baat mat kiije

jaane aane meñ vaqt lagtā hai

aazmā mat, bharosa kar mujh par

āzmāne meñ vaqt lagtā hai

yak-ba-yak bhūlnā hai nā-mumkin

bhuul jaane meñ vaqt lagtā hai

vo abhī ban sañvar rahī hogī

us ko aane meñ vaqt lagtā hai

jaam piite haiñ jo nazar se unheñ

jaam uThāne meñ vaqt lagtā hai

beTiyoñ ko bachā ke rakhiye 'kañval'

in ko paane meñ vaqt lagtā hai