ik nasha sā zehn par chhāne lagā
aap kā chehra mujhe bhāne lagā
chāñdnī bistar pe itrāne lagī
chāñd bāñhoñ meñ nazar aane lagā
ruuh par madhoshiyāñ chhāne lagīñ
jism ġhazleñ vasl kī gaane lagā
tum karam-farmā hue sad-shukriya
ḳhvāb merā mujh ko yaad aane lagā
rafta rafta yāsmīñ khilne lagī
mausam-e-gul ishq farmāne lagā
zulf kī ḳhushbū shagufta lab 'kañval'
manzar-e-pur-kaif dikhlāne lagā