zaḳhmoñ ko kuredā hai to maazī nikal aayā

sūkhe hue dariyāoñ se paanī nikal aayā

us shaḳhs ko paḌhne meñ baḌī chuuk huī thī

vo dost thā jo dushman-e-jānī nikal aayā

tishna the bahut dhuup meñ bhīge hue manzar

kal raat to sūraj se hī paanī nikal aayā

jo shaḳhs nahīñ jāntā islām ke ma.anī

hairat hai ki islām kā daa.ī nikal aayā

go us ne ġhazal apne buḌhāpe meñ kahī hai

ġhazloñ meñ magar rañg-e-javānī nikal aayā