bahār aa.ī guloñ ko hañsī nahīñ aa.ī
kahīñ se bū tirī guftār kī nahīñ aa.ī
kuchh aur vajah hai kam ho ga.ī hai lazzat-e-jām
hamārī pyaas meñ koī kamī nahīñ aa.ī
ye kā.enāt sab āġhosh-e-nīm-shab meñ hai
zamāna ho gayā āvāz hī nahīñ aa.ī
dil ik daraḳht-e-zamīñ-bos baad o bārāñ se
ruteñ guzar ga.iiñ koñpal na.ī nahīñ aa.ī
na jaane kaisī ghaḌī se guzar rahe the ham
ki jāgte na rahe niiñd bhī nahīñ aa.ī