lab-e-ḳhirad se yahī baar baar niklegā

nikālne hī se dil kā ġhubār niklegā

ugeñge phuul ḳhayāloñ ke reg-zāroñ se

ḳhizāñ ke ghar se julūs-e-bahār niklegā

kahīñ fareb na khānā yahī fidā-e-jām

ba-vaqt-e-kār ajab hoshyār niklegā

chaman kā husn samajh kar sameT laa.e the

kise ḳhabar thī ki har phuul ḳhaar niklegā

ye hukm hai ki koī rāh-e-rāst par na chale

havā ke ghoḌe pe koī savār niklegā

kise nahīñ hai shikāyat 'razā' zamāne se

TaTolo koī jigar dāġh-dār niklegā