hamārī zaat meñ baste sabhī haiñ
ham achchhe haiñ to phir achchhe sabhī haiñ
yaqīñ kaise kareñ va.ade pe tere
yahī va.ada hai jo karte sabhī haiñ
dikhā.ī kyuuñ nahīñ detā kisī ko
ḳhudā kī khoj meñ nikle sabhī haiñ
mire andar faqat qatra nahīñ hai
samundar jhiil aur jharne sabhī haiñ
zamīñ par aa.egā vo āsmāñ se
nazāra dekhne Thahre sabhī haiñ
chalī thī ik havā kuchh der pahle
usī ke ḳhauf se sahme sabhī haiñ
sabaq lete nahīñ ham kyuuñ kisī se
hamāre sāmne qisse sabhī haiñ