shauq-e-ḳharāsh-e-ḳhār mire dil meñ rah gayā
pā-e-talāsh pahlī hī manzil meñ rah gayā
maiñ zamzama-sarā to chaman se gayā vale
afsāna ik giroh-e-anādil meñ rah gayā
zanjīr-e-mauj paañv meñ aa kar lipaT ga.ī
tūfāniyoñ kā dhyān hī sāhil meñ rah gayā
tasvīr us kī kaise khiñchī mānī-e-ḳhayāl
hairān jis kī shakl-o-shamā.il meñ rah gayā
kaam apnā to tamām kiyā yaas ne 'havas'
jī ishtiyāq-e-ḳhanjar-e-qātil meñ rah gayā