bāni-e-jaur-o-jafā haiñ sitam-ījād haiñ sab

rāhat-e-jāñ koī dilbar nahīñ jallād haiñ sab

kabhī tuubā tire qāmat se na hogā baalā

bāteñ kahne kī ye ai ġhairat-e-shamshād haiñ sab

mizha o abrū o chashm o nigah o ġhamza o naaz

haq jo pūchho to mirī jaan ke jallād haiñ sab

sarv ko dekh ke kahtā hai dil-e-basta-e-zulf

ham giraftār haiñ is baaġh meñ āzād haiñ sab

kuchh hai behūda o nāqis to 'amānat' kā kalām

yuuñ to kahne ko fan-e-sher meñ ustād haiñ sab