muñh āñ.suoñ se apnā abas dho rahe ho kyuuñ

hañste jahān biich khaḌe ro rahe ho kyuuñ

aa jaao apne mukh se mukhauTā utaar kar!

bahrūpiyoñ ke saath samay kho rahe ho kyuuñ

kyā is se hogā ruuh ke zaḳhmoñ ko fā.eda

TuuTe diloñ kī sun ke sadā ro rahe ho kyuuñ

is ghūmtī zamīn kā mehvar hī toḌ do

be-kār gardishoñ pe ḳhafā ho rahe ho kyuuñ

ye būḌhī nasl jab ki tumheñ māntī nahīñ

apne badan meñ is kā lahū Dho rahe ho kyuuñ