darvāze ko piiT rahā huuñ paiham chīḳh rahā huuñ
andar aa kar khul jā sim-sim kahnā bhuul gayā huuñ
khoj meñ terī an-gin Trāmeñ aur baseñ chhānī haiñ
koltār kī saḌkoñ par mīloñ paidal ghūmā huuñ
be-pāyāñ ākāsh ke maqnātīsī jaal se bach kar
ḳhauf-zada sā maiñ dhartī ke siine se chimTā huuñ
barsoñ pahle bikhar ga.ī thī TuuT ke jo sahrā meñ
us laḌkī ke jism ke bikhre TukḌoñ ko chuntā huuñ
maañ kī kokh se qabr kā rasta duur nahīñ thā phir bhī
maiñ jīvan kī bhūl-bhulayyāñ se ho kar guzrā huuñ
shāyad merā dukh sunñe ko vā hoñ gosh kisī ke
din bhar bahroñ DoñDoñ kī nagrī meñ chillātā huuñ